Rawngbawlna VI

Ni 11.12.2010 (Inrinni) zan khan Zomi Baptist Church-ah rawngbawlna hlawhtling tak neih a ni a. Hemi hunah hian Pu C Lalremruata hnen atanga Pathian thuchah ngaihthlak a niin, C Vanlalzuia, Lalchawileni, Kimteii leh K Lalremruata te hnen atangin Pathian fakna hla mawi tak tak ngaihthlak a ni a.
Ni 12.12.2010 (Pathianni) chawhma inkhawmah Zomi Baptist Church-ah bawk rawngbawlna neih ni lehin, Tv Hranghluna hnen atanga Pathian thuchah ropui tak ngaihthlak a ni leh a. Hemi inkhawmah hian Lalramnghaka, Kimteii, Lalchawileni leh Zoramthara te hnen atanga Pathian fakna hla ropui tek tekte ngaihthlak leh bawk a ni.

Rawngbawlna V

Ni 06.12.2010 zan khan Zotlang Presbyterian Kohhran-ah rawngbawlna neih a ni a, Group zai neih a niin Pu C Lalremruata hnen atangin Pathian thuchah ngaihthlak a ni a. A tuk Pathianni ni 07.12.2010 Chawhnu Inkhawmah Tv Hranghluna hnen atanga Pathian thu ngaihthlak a niin, Maruata, Ruatfeli, Pantea, Chawiteii leh Zoramthara ten Pathian fakna hla ropui tak tak te an hlan a ni.

Rawngbawlna IV

Ni 27.11.2010 (Inrinni) zan atanga ni 28.11.2010 (Pathianni) chawhnu leh zan inkhawmah te Bethel Vengthar Presbyterian Kohhran-ah rawngbawlna hlawhtling taka hun hman a ni a. Ni 27.11.2010 (Inrinni) zan hian Tv. Hranghluna hnen atangin Pathian thuchah ropui tak ngaihthlak a ni a, kan zaithiam ten hun an hmang bawk a. Tin, ni 28.11.2010 (Pathianni) chawhnu ah hian Tv. Hranghluna hnen atang bawkin Pathian thuchah ngaihthlak a ni leh a, soloists lam ten Pathian fakna hla ropui tak tak te an rawn hlan bawk a. Ni 28.11.2010 (Pathianni) zan inkhawmah hian Pu C Lalremruata hnen atangin sermon ropui tak ngaihthlak a ni leh a, hetah hian Gospel singers Ministry zaipawlin Halleluiah! Amen!! tih sa in, soloists thahnem takin Pathian fakna hla an hlan leh bawk a, tin, The Shephards' Band ten Live in an rawn perform thei bawk a.

Inkhawm a nuamin Thlarau Thianghlim pawh a zalen a, kham lo takin he Bethel Vengthar Presbyterian Kohhran a rawngbawlna hi hman zawh a ni ta a ni. Inkhawm banah hian Mualbuvum-ah Krista Bawihte Team leh Kahrawt Presbyterian Kohhran atanga mi thahnemngai te leh New Champhai Presbyterian Kohhran KTP te nen tawngtaina hun hman chhunzawm leh a ni a. Zan dar 12 ah New Champhai Presbyterian Kohhran Upa Hrangkaia Inah Arsa buhchiar pirin hun hlimawm tak hman zui a ni.

Rawngbawlna III

Ni 23.11.2010 (Thawhlehni) zan khan New Champhai Presbyterian Kohhran-ah Upa TBC Rotluanga'n Crusade a neih na ah Pu Lalramliana Ngente chuan Pathian Fakna hla ropui tak a hlan a. Ni 26.11.2010 (Zirtawpni) zan khan he New Champhai Presbyterian Kohhran-ah Upa TBC Rotluanga'n Crusade a neih na ah Champhai gospel Singers Ministry-te chuan inkhawm a tawiawm lehin Tv K Lalremruata, Nula Lalromawii leh Nula Zairemthangi Ralte ten Pathian fakna hla ropui tak takte an hlan leh bawk a ni.

Rawngbawlna II

Ni 21.11.2010 (Pathianni) khan Hmunhmeltha a Hunthar Presbyterian Kohhran-ah Chawhnu hun leh zan hunah te rawngbawlna neih a ni a. Chawhnu hunleh zan hunah hian Tv Hranghluna hnen atangin sermon ropui tak ngaihtlak a ni a, zaithiam lam atangin solo engemaw zat neih a ni bawk a. Zan hunah hian zaipawl in Halleluiah! Amen!! tih hla ropui takin an rem bawk a ni. Kohhran-te in hawnna a ropuiin Inkhawm boruak pawh a nuam hle a ni.

Rawngbawlna I

Ni 13.11.2010 (Inrinni) zan khan Kahrawt Kohhran Presbyterian Kohhran-ah Pathian faka zaia rawngbawlna neih a ni a. He hunah hian Nula Lalromawii leh Nula Lalbiakfeli ten hla pakhat ve ve an hlan a, zaipawl in hla pakhat neiin Pu C Vanlalzuia hla - Halleluiah! Amen!! tih sak a ni a, Thlarau Thianghlim a zalen in, Pathian hnathawh ropui tak a thleng a ni.

PRAISE & WORSHIP SERVICE

Praise & Worship Service hi lo thlir lawk tawh angin Ni 18.11.2010 zan khan Vengthlang Presbyterian Kohhran Centenary Hall-ah hlawhtling taka neih a ni a. He Praise & Worship Service hi CCN nena tang kawpin CCN-te hian Live in an pe chhuak a, mipui lam pawhin an hlutsak hle a ni. He hun hi zalen taka hman a niin, thlarau a tuihalna nei leh Pathian fak duhna nei tak tak te an fuan khawm a, Thlarau Thianghlim pawh a zalenin he hun hmang tute leh zaia rawngbawlna nei ten an hlawkpui hle a ni.

Tunlai hian Champhai khawpui chhung a Kohhran hrang hrangah Pathian Thlarau Thianghlimin hna a thawk nasa hle a, hemi boruak atanga hetianga Praise & Worship Service neih duhna thinlung rawn in irh chhuak hi a ni a. He hunah hian Kohhran hrang hrang atanga Kohhran hruaitute an tel theih bakah Vengthlang Presbyterian Kohhran Bialtu Pastor Rev. Laldailova'n hunserh hmangin, Bethel Presbyterian Kohhran Bialtu Pastor Rev. C. Lalremruata'n huntawp tawngtaina leh Malsawmna in a khar a ni.

He Praise & Worship Service-ah hian Champhai khaw chhunga Pathian fakna hla sa thin mi 12 te hnen atangin Pathian fakna hla ropui tak tak ngaihthlak a ni a, chubakah Quartet leh Male Voice te ngaihthlak a ni bawk a. Hla sak hona hun tha tak takte neih a nih bakah tawngtai rualna te neih a niin, The Shephard's Band hnen atangin hla tha leh ropui tak ngaihthlak a ni a. Tin, The Shephard's Band-te hian Live in kan zaithiamte hla an rem sak bawk a ni.

Gospel Singers Team-ah hian Members 40 dawn lai tunah hian an awm mek a, zaithiam emaw zaithiam lo amaw tan pawh Pathian faka, he pawl hmalakna tui pui tute tan member a nih theih reng a, heng - Mobile No. 8014225209/8974305547 ah te hian zawhfiah/inhriattir theih a ni e.

Praise & Worship Service neihna hmun atana Vengthlang Presbyterian Kohhran-in phal taka an Centenary Hall-an hman tir avang hian Gospel Singers Team-te hi an lawm hle a ni.

Nakinah khua var hunah chuan - Kahrawt Branch KTP

Chatuan Rammawi - Kahrawt Pastor Bial Zaipawl

TAWNGTAI RAMMUT

Gospel Singers Team-te hian a bul tan nan leh hma han lak hmasak ber nan 'Praise & Worship Service' neih nise tiin rawtna an siam a, mahse an zam hle a. An mahni an in enin tlinglo an in tiin an in sit em em a. Pathian fak a zaia rawngbawlna neih tha an tiin an thahnem ngaihna erawh a nasa hle a. Huphurh tak chung in Pathian Ram tana an thahnem ngaih em avangin Praise & Worship Service chu neih ngei an tum ta tho a.

He Praise & Worship Service neihna tur atan hian in buatsaih nan Cheng Khat pawh neih a ni chuang lova, Amah intum chawp thin Pathian kutah innghatin Thlarau Thianghlim zai ngai chung zelin an awm tawp mai a. An mahni dnhmun an in enin tlinna reng an neih loh zia an in hria a, chuvang chuan chuti maia Praise & Worship Service nei lovin, Praise & Worship Service atana inbuatsaih nan leh Thlarau Thianghlim pawlna thar an dawn theih nan leh Thlarau a chhunkhah a an awm theih nan 'Tawngtai Rammut' an rawt ta phawt a.

Ruahmanna tluang taka kalin Ni 17.11.2010 (Ninga Ni) tlaiah Champhai District LAD Picnic Spot-ah, member 37 zet an riak lut a. Heng member 37 zingah hian hmeichhia 6 an awm a, tin, Emanuael After Care atangin tlawmngaia ei rawng bawl sak turin mi 2 an rawn tel bawk a ni. He tawngtai rammutna ah hian Speaker atan Emanuel After Care a an hotupa Tv. Hranghluna a ni a, Secondary Speaker-ah Pu C Lalremruata ***** a Speaker chu hman a ni bawk a. A zan khatna atangin boruak a tangin a nuam hle a, Thlarau Thianghlim a zalen a ni tih hriat takin, Sermon ngaihtlak a nuam a, Tawngtai a nuam a, tin, Zai ho leh Hla zir pawh a nuam hle a ni. He Tawngtai Rammutna hmunah hian Music Instrument kimchang tak ken a ni bawk a, hei hian boruak a ti nuam hle bawk a. Tin, DLAO(C) R. Lalnunmawia MCS inpekna zarah inthlahrung hauh lovin a hmunah hian kan duh ang tawk a awm a phal avangin kan lawm hle bawk a ni.

FOUNDATION

2010 atanga din Champhai District Promoters' Club chuan Champhai District chhunga thalai te promote a an tuina kawnga hruai a,sual lam atanga chhanchhuah nan kawng chi hrang hrang a dap a. Hemi atana hmalakna hmasa ber chu Champhai District chhung atanga zaithiam (Pathian Fakna Hla sa leh Lengzem/Lenglawng Hla sa) te, Mizoram pum a lar chhuak, Champhai District lo ti hmingtha tawh tute hnena Award hlan a ni a.

He Award hlanna hun programme pawh hi harsa tak leh hautak takin hman a ni a, a hlawhtling hle nghe nghe a ni. He hunah hian mi 20 chuang hnenah Award hi hlan a ni a. He Award sem hi a hmingah 'Saihnuna Award 2010' phuah a ni a. Hei hi Leng Lal Saihnuna tu leh fate'n Award hi an rawn sponsored vang a ni (an chungah kan lawm hle).

Tichuan, thahnemngaihna a lo nasa chho zel a, Praise & Worship neih tha tihna rilru a rawn irh chhuak a, mahse hei hi chu tihpuitlin theih a ni ta hrih lova, rilru a awm reng chungin hun remchanga buatsaih tum ruk chu a la ni tho a ni.

Hun a lokal zel a, Ni 10.10.2010 (hei hi Champhai North Presbytery, Bethel Kohhran Biak In-a neih lai a ni) chawhnu Inkhawm ban chuan Pu Hruaia leh Nula Laldinngheti te thanhnemngai chuan Champhai khawpui chhunga zaithiam te a rem rem ko khawmin Nula Laldingngheti te inah an thu ho a (he hun hi Champhai khawpui chhung a Thlarau Thianghlim nasa taka a in puan lai a ni). Champhai District Promoters' Club ten an rilru a lo awm thin Praise & Worship chungchang te an sawi ho a, zaithiam ten an chakin an phur em em a, amaherawhchu Champhai District Promoters' Club chu huap zo leh zalen tak a nih avangin hming dang in phuah a tha in an hria a. Nula Laldinngheti chuan 'Gospel Singers Team' nise tiin a thawh a, tha an ti tlang a niang an pawm thlap a, tichuan Committee-te la neih chhunzawm a, a rang lama bawhzui turin thu an dah ta a.

Tichuan, committee-te nei zuiin Pu Israela chu Convener atan an pem buh bel ta chawt a, a ni chuan Pathian rawngbawlna a ngaiin lawm takin a lo pawm thei a. Pathian chakna ringin, Thlarau Thianghlim tanpuina leh kaihhruaina ngaichang chungin he pawl 'Gospel Singers Team' hi a lo ding ta a ni.